«Как поживаешь, ветеран?» рубрика
Румянцева Мария Ивановна, тыыл бэтэрээнин ахтыыта.
Мин ыам ыйын 29 күнүгэр 1935 сыллаахха Найахы нэһилиэгэр Софья Андреевна уонна Иван Иванович III Гоголевтар диэн холкуостаахтар кэргэннэригэр төрөөбүтүм.
Кыра эрдэхпиттэн ийэбин кытта сайынын ньиирэйдэри көрсөрүм, ол иһин сүөһүнү таптыыр, бу түбүктээх үлэни сөбүлүүр буола улааппытым. О5о сааһым сэрии ыар кэмнэригэр ааспыта.
6-с кылааһы бүтэрэн, холкуоска сүөһү көрүүтүгэр үлэлии тахсыбытым. Ол курдук, 20тэн тахса сыл төрөөбүт нэһилиэгим холкуоһугар, сопхуоһугар ньиирэй, борооску көрүүтүгэр идэтийэн үлэлээбитим. Ыччат сүөһүнү төлөһүтүүгэ үгүс уопуту мунньунан, оройуоңңа бастыңнар кэккэлэригэр тахсыбытым. Сыллата былааммын толорорум. 1980 сыллаахха кыһыңңы ыйдарга биир борооску орто эбиллиитин 137 кг тириэрдэн, оройуоңңа чемпион үлэһит бочуоттаах аатын ылан, «Жигули» массыына пуондатынан бириэмийэлэммитим.
1979-80 сыллар кыстыктарыгар үрдүк көрдөрүүнү ситиспитим иһин, Саха АССР Үрдүкү Сэбиэтин Президиумун Бочуотунай грамотатынан на5араадаламмытым.
Х пятилетка сылларыгар «Социалистическай куоталаһыы кыайыылаа5а» бэлиэлэри ылбытым. Хас да төгүл «Чемпион — төлөһүтээччи» аатын ылан, үгүс пуондаларынан бириэмийэлэммитим. СЕ тыатын хаһаайыстыбатын бочуоттаах бэтэрээнэ буолбутум, тыыл, үлэ бэтэрээнэбин.
Кэргэним Кирилл Дмитриевичтыын 6 о5ону төрөтөн, үөрэттэрэн, үлэһит дьон оңордубут.
Билигин Найахыга сиэммэр олоробун. Барыгытын Улуу Кыайыы 80 сылынан итиитик-истиңник э5эрдэлиибин! Ба5арабын чэгиэн туругу, иллээх — эйэлээх оло5у!
