Улуустааҕы социальнай кэлим киин оҕолорго анаан Кыайыы 80 сылын көрсө былааннаах үлэни бу сыл саҕаланыаҕыттан тэрийэр. Ол курдук Арассыыйа үрдүнэн ыытыллар аахсыйаларга («Кино Победы», «Песни Победы», «Стихи Победы», «Письмо солдату», «Окна Победы», «Чтения Победы») кыттыһан оҕолор элбэҕи биллилэр-көрдүлэр, Улуу Кыайыы туһугар олохторун толук уурбут уонна эргиллэн кэлэн эйэлээх олоҕу тутуспут буойуттар сырдык кэриэстэригэр сүгүрүйэ бэйэлэрин махталларын биллэрдилэр.
Стационар отделениетын иитиллээччилэрэ бэйэлэрин илиилэринэн ытык дьоҥҥо – бэтэрээннэргэ анаан хоһоонноох аккырыыккалары, георгиевскэй лиэнтэлээх броштары, «Өйдүүбүт, сүгүрүйэбит, махтанабыт!» истиэндэни кыһаллан оҥордулар, билигин Ийэ дойдуларын көмүскүү сылдьар саллааттарга суруктары суруйдулар, түннүктэргэ Кыайыы бэлиэлэрин кырыйан сыһыардылар. Бу күннэргэ өссө «Свеча Памяти», «Моя история», “Ура, Победе!” аахсыйаларга, итиэннэ «Өспөт тыыннаах полк» хамсааһыҥҥа кыттыахтара.
Ыам ыйын 6 күнүгэр үгэс буолбут “Махтал Эйиэхэ, бэтэрээн!” аахсыйа иһинэн “Мы – наследники Великой Победы” тэрээһиҥҥэ тыыл бэтэрээнэ Мария Егоровна Фомина уонна сэрии кэмин оҕото Роза Константиновна Сидорова ыҥырыллан күндү ыалдьыт буоллулар. Тэрээһини иитээччи Иван Окоемов иилээн-саҕалаан ыытта. Тэрилтэ салайааччытын солбуйааччыта Елена Кривошапкина Улуу Кыайыы 80 сыллаах үбүлүөйүнэн эҕэрдэтин тиэртэ уонна эҕэрдэ суруктары, бэлэхтэри туттарбытыгар ыалдьыттар олус долгуйдулар.
Салгыы бэйэлэрин оччотооҕу кэмнэрин ахтан-санаан үйэлээх өйдөбүлү тириэрдиилэрэ тэрээһини ураты тыыннаата. Оҕолор уонна үлэһиттэр ытыктабыллаах бэтэрээннэргэ хоһоон аахтылар, ырыа ыллаатылар, бэлэхтэрин туттардылар.
Бу дириҥ суолталаах дьоро күн үс көлүөнэ истиҥ көрсүһүүтэ, алгыстаах алтыһыыта буолан баар дьону барыларын уйадытта. Ытык кырдьаҕастар оҕолору сахалыы сырылаччы сыллаабыттарыттан аныгы оҕолор соһуйдулар, ол эрээри олус астыннылар. 95 саастаах Мария Егоровна үөрүүтүттэн ырыа ыллаабытын бары ытыс таһынан биһирээтилэр. Салгыы балыктыыр дьарыктаах иитээччи Евдокия Максимова сибиэһэй соболору кэһии гынан туттарыыта соһуччу бэлэх буолан үөрүүлэрин өссө үрдэттэ.
Сылаас тыыннаах,эйэҕэс эйгэлээх бу тэрээһин кинилэр сүрэхтэригэр тиийэн, сүргэлэрин көтөҕөн туруктарын тупсардын, үйэлэрин уһаттын!
Светлана Бурцева, уопсас. кэрэсп.