Уус Алданнааҕы нэһилиэнньэ социальнай көмүскэлин кэлим киинэ өрөспүүбүлүкэтээҕи «Аныгы тэриллэргэ сахалыы суруй!» аахсыйаҕа кыттан, олунньу устата оҕотуттан саҕалаан аҕам саастаах ытык дьоҥҥо тиийэ төлөпүөннэригэр сахалыы аттарыыны туруоруналларыгар сүбэлиир, көҕүлүүр, көмөлөһө үлэтин тэрийэн ыытта.
Онно барыта 350-ча киһи хабылынна. Ордук көхтөөхтүк стационарнай отделение үлэһиттэрэ кытыннылар. Кинилэр ый устата холбоон 130 оҕону уонна 177 улахан киһини хаптылар.
Билигин төрөөбүт тылбыт туруга тупсарын туһугар хас биирдиибит күннэтэ кыһаллара олус суолталаах буолар кэмигэр олоробут. Күн бүгүн оҕотуттан кырдьаҕаһыгар тиийэ күнү быһа тута сылдьар тэрилбит – төлөпүөн. Бу тэрил олохпут эргийэр киинин кэриэтэ буолла. Онон бу аныгы тэрилгэ сахалыы дорҕооннору туһаныы – ийэ тылга тапталы, сыһыаны көрдөрүү, тылбыт баар буолуутун мэктиэтэ диэтэхпинэ сыыспатым буолуо. Саха буоларбытын биллэрэр аҕыйах дорҕооммутун мэлдьи туттар буоллахпытына, сахабыт тыла тыыннаах буолуо этэ.
Сахалыы аттарыы аан бастаан 2011 сыллаахха баар буолбута, оттон бу аахсыйа 2015 сылтан ыытыллар. Ити кэмтэн үгүс сыл ааста. Ол эрээри билигин даҕаны сахалыы буукубалары нууччалыы буукубаларынан солбуйтаран суруйар киһи элбэх. Ыал аайы ийэ барахсан ийэ тыл туһугар дьайыылаахтык хамсанара буоллар дьиэтин иһинээҕи дьоно күннэтэ сахалыы суруйалларын, суруйсалларын ситиһэр кыахтаах диэн бигэтик этиэххэ сөп. Оттон тэрилтэ бу хайысхаҕа үлэлэһиитэ салгыы салҕанан барыаҕа.
Тыл омук сүрүн бэлиэтэ буоларын өйдүөҕүҥ, умнумуоҕуҥ! Төрөөбүт тылбыт балысхан сайдыыга баһыйтарбакка өрүү баар буоллун!
Светлана Бурцева, уопсас. кэрэсп.