Бүгүн, ол эбэтэр сэтинньи 27 күнүгэр, Бэрт- Ууһун нэһилиэгэр, И. С. Портнягин аатынан Сыырдаах орто оскуолатыгар Өрөспүүбүлүкэтээҕи «Ыал тула сэһэн» норуот үөрэҕириитин кэмпириэнсийэтэ ыытылынна.Тэрээһин сыала: дьиэ кэргэҥҥэ оҕону иитии үгэстэрин, ситимин, үөрүйэхтэрин төрөппүт, дьон- сэргэ билиитигэр таһааран сырдатыы, дьиэ кэргэҥҥэ оҕону иитиигэ бастыҥ холобурдары көрүү,тарҕатыы буолар. Биһиги специалистарбыт, төрөппүттэрбит көхтөөх кыттыыны ыллылар. Ол курдук:
» Экодухуобунас — сайдыы саҥа үөрэҕэ» түһүлгэҕэ социальнай педагог Виктория Кондратьева уонна элбэх оҕолоох төрөппүппүт кыттыыны ыллылар. Норуот үөрэҕириитин тарҕатааччы, суруналыыс Татьяна Жиркова оҕону иитиигэ сахалыы ньымаларын, толкуйдарын үллэһиннэ. «Төрөппүккэ сүбэ» түһүмэххэ, социальнай үлэҕэ специалист Мария Готовцева «Аҕа алгыһынан,Ийэ иэйиитинэн» бырайыагы көмүскээтэ,социальнай педагог Юлия Бурцева оҕо буруйу кэспэтин курдук төрөппүттэргэ тэттик сүбэлэри үллэһиннэ,иитээччи Зоя Сивцева «Оҕуруо оһуора» куруһуогун бырайыагын сырдатта,ону таһынан выставка көрдөрдө, «Араҥаччы» бырайыак үлэтин туһунан медицина үлэһитэ Наталья Гуляева интириэһинэйдик кэпсээтэ, иитээччи Евдокия Максимова «Айыы муннуга» оҕо иитиитигэр суолталааҕын бырайыагынан көмүскээтэ.Салгыы специалистар кэмпириэнсийэ пленарнай чааһыгар санаа атастаһыытыгар, резолюция ылыллыытыгар кытыннылар. Тиһэҕэр үлэ опытын тарҕатыы туоһу суруктары туттулар.Онон үлэҕэ инники торумҥа сөптөөх туһалаах күн ааста.